Neftçala rayonunda şəhid Xankişiyev Elşən Elşad oğlunun, Səmədov Camal Vüqar oğlunun il mərasimləri keçirilib
21 sentyabr 2024 | 09:58
Azərbaycanın Qarabağ bölgəsində keçirilən lokal antiterror tədbirləri zamanı Neftçala şəhərində anadan olan Azərbaycan Ordusunun hərbi qulluqçusu Xankişiyev Elşən Elşad oğlunun və Xol Qarabucaq kəndində anadan olan Səmədov Camal Vüqar oğlunun il mərasimləri keçirilib, məzarları ziyarət olunub.
Mərasimdə Neftçala Rayon İcra Hakimiyyətinin başçısı Mirhəsən Seyidov, Daxili İşlər Nazirliyinin Baş İctimai Təhlükəsizlik İdarəsinin rəisi, polis general-mayoru Sərdar Səfərov, RİH-in məsul şəxsləri, hüquq- mühafizə orqanlarının, idarə, müəssisə, təşkilatların rəhbərləri, şəhid ailələri, şəhidin hərbiçi yoldaşları, qazilər, din xadimləri və rayon ictimaiyyəti iştirak edib.
Azərbaycan Ordusunun hərbi qulluqçusu Xankişiyev Elşən Elşad oğlu 23 iyun 2000-ci ildə Neftçala şəhərində anadan olub və keçirilən lokal antiterror əməliyyatları zamanı qəhrəmancasına şəhid olub. Şəhid Xankişiyev Elşən Elşad oğlu 21 sentyabr 2023-cü il tarixində Neftçala şəhəri Şəhidlər Xiyabanında dəfn olunub.
Azərbaycan Respublikasının Prezidenti cənab İlham Əliyevin 24.12.2020-ci il tarixli Sərəncamına əsasən "Cəbrayılın azad olunmasına görə" medalı, 25.12.2020-ci il tarixli Sərəncamına əsasən "Füzulinin azad olunmasına görə" medalı, 29.12.2020-ci il tarixli Sərəncamına əsasən "Şuşanın azad olunmasına görə" medalı ilə və Azərbaycan Respublikasının Baş Naziri Əli Əsədovun 21.04.2022-ci il tarixli Sərəncamına əsasən "Vətən müharibəsi iştirakçısı" medalı ilə ölümündən öncə təltif edilib.
Azərbaycan Respublikasının Prezidenti cənab İlham Əliyevin 7.11.2023-cü il tarixli Sərəncamı ilə Xankişiyev Elşən Elşad oğlu ölümündən sonra 3-cü dərəcəli “Vətənə xidmətə görə” ordeni və “Vətən uğrunda” medalı ilə təltif olunub.
Azərbaycan Ordusunun hərbi qulluqçusu Səmədov Camal Vüqar oğlu 11 iyul 1991-ci ildə Neftçala rayonunun Xol Qarabucaq kəndində anadan olub və keçirilən antiterror əməliyyatları zamanı qəhrəmancasına şəhid olub. Şəhid Səmədov Camal Vüqar oğlu 21 sentyabr 2023-cü il tarixində Neftçala rayonu Xol Qarabucaq kənd qəbiristanlığında dəfn olunub.
Azərbaycan Respublikasının Prezidenti cənab İlham Əliyevin 7.11.2023-cü il tarixli Sərəncamı ilə Səmədov Camal Vüqar oğlu ölümündən sonra 3-cü dərəcəli “Vətənə xidmətə görə” ordeni və “Vətən uğrunda” medalı ilə təltif olunub.
Neftçala Rayon İcra Hakimiyyətinin kollektivi, rayon ictimaiyyəti adından şəhid hərbi qulluqçularımızın ailələrinə və yaxınlarına dərin hüznlə başsağlığı veririk.
Keçidlər
