Neftçala rayonunda "Nə? Harada? Nə zaman?" intellektual oyunu keçirilib

17 dekabr 2024-cü il tarixində Şirvan-Salyan Regional Gənclər və İdman İdarəsinin Neftçala rayonu üzrə gənclər və idman sektoru və Şirvan-Salyan Regional Təhsil İdarəsi Neftçala rayon təhsil sektorunun birgə təşkilatçılığı ilə Neftçala rayon ümumtəhsil məktəblərində çalışan müəllimlər arasında "Nə? Harada? Nə zaman?" intellektual oyunu formatında rayon birinciliyi keçirilib.

Yarışda ilk öncə xalqımızın Ümummilli lideri, Ulu Öndər Heydər Əliyevin və Azərbaycan Respublikasının ərazi bütövlüyünün, müstəqilliyinin, konstitusiya qurluşunun müdafiəsi zamanı şəhid olan hərbi qulluqçuların əziz xatirəsi bir dəqiqəlik sükutla yad edilib və Azərbaycan Respublikasının Dövlət Himni səsləndirilib.

Tədbirdə Neftçala Rayon İcra Hakimiyyəti başçısı aparatının məsul əməkdaşı, YAP Neftçala rayon təşkilatının sədri, Neftçala rayon gənclər və idman sektorunun rəhbəri və məsul şəxsləri, Neftçala rayon Təhsil sektorunun müdiri, Neftçala Olimpiya İdman Kompleksinin direktoru, rayon ümumtəhsil məktəblərinin rəhbərləri, müəllimlər iştirak edib.

Yarış başlamadan öncə Neftçala Rayon İcra Hakimiyyəti başçısı aparatının aparıcı məsləhətçisi Esmira Məmmədzadə, təşkilatçı qurum rəhbərləri - Neftçala rayon gənclər və idman sektorunun müdiri Araz Əhmədov, Neftçala rayon Təhsil sektorunun müdiri Nicat Cəfərov, Neftçala Olimpiya İdman Kompleksinin direktoru Asif Bayramov çıxış edərək rayonda təşkil olunan müxtəlif intellektual yarışların əhəmiyyəti barədə məlumat verib və iştirakçı komandalara xoş arzularını bildiriblər.

Ümumilikdə 105 nəfər müəllim olmaqla 21 komandanın birincilik uğrunda mübarizə apardığı intellektual yarış hər turda 12 sual olmaqla 3 turda təşkil olunub. Yarışda komandalara ümumi bilik və dünyagörüşünü əhatə edən 36 sual təqdim edilib.

Gərgin keçən mübarizənin yekununda Neftçala rayon II Qaralı kənd tam orta məktəbi təmsil edən "Zəfər" komandası I yerdə, Neftçala şəhər N.Gəncəvi adına 3 nömrəli tam orta məktəbi təmsil edən "Zəfər yolu" komandası II yerdə, Bankə qəsəbə S.Vurğun adına 2 nömrəli tam orta məktəbi təmsil edən "Turan" komandası isə III yerdə qərarlaşıb.

Sonda Qalib komandalar kubok, diplom, medal və müxtəlif hədiyyələrlə təltif olunublar.