Neftçala rayonunda mini-futbol üzrə rayon birinciliyinə start verilib
02 may 2023 | 15:34
Neftçala Rayon İcra Hakimiyyətini təşəbbüsü, Yeni Azərbaycan Partiyası Neftçala rayon təşkilatı, Neftçala rayon Gənclər və İdman İdarəsinin birgə təşkilatçılığı ilə "Heydər Əliyev İli" və Ulu Öndərin anadan olmasının 100 illik yubileyi münasibətilə rayonun idarə, müəssisə, təşkilatları arasında mini-futbol üzrə rayon birinciliyinin açılış mərasimi keçirilib.
Açılış mərasimində Neftçala Rayon İcra Hakimiyyətinin məsul şəxsləri, YAP Neftçala rayon Təşkilatının sədri, Neftçala rayon Gənclər və İdman İdarəsinin rəisi, Şirvan-Salyan Regional Təhsil İdarəsi Neftçala Təhsil sektorunun müdiri, əməkdaşları və futbol komandaları iştirak edib.
İlk öncə Ümummili Lider Heydər Əliyevin, Azərbaycanın suverenliyi, ərazi bütövlüyü və torpaqlarımızın azadlığı uğrunda canlarından keçən şəhidlərimizin əziz xatirəsi bir dəqiqəlik sükutla yad olunub və Azərbaycan Respublikasının Dövlət Himni səsləndirilib.
Məlumat üçün bildiririk ki, mini-futbol üzrə rayon birinciliyi mərhələlərlə 9 may tarixinə qədər davam edəcək və rayon birinciliyində 16 komanda iştirak edir.
Keçidlər
