Neftçala rayonunda Azərbaycan Qadınlarının VI Qurultayına hazırlıq məqsədilə konfrans keçirilib
Neftçala rayonunda Azərbaycan Qadınlarının VI Qurultayına hazırlıq məqsədilə Neftçala Rayon İcra Hakimiyyətinin təşkilatçılığı ilə Rayon İcra Hakimiyyətində Rayon Qadınlarının VI Konfransı keçirilib.
Konfransda Rayon İcra Hakimiyyətinin məsul işçiləri, rayonun təhsil, səhiyyə, mədəniyyət sahəsində çalışan,rayonun ictimai-siyasi həyatında fəallığı ilə seçilən ziyalı qadınlar, şəhid və qazi ailələrinin üzvləri iştirak edib.
İlk öncə tədbir iştirakçıları Neftçala şəhərinin mərkəzində ucaldılan Ümummilli Lider Heydər Əliyevin abidəsini ziyarət ediblər, önünə gül dəstələri düzüblər.
Konfrans Ulu Öndər Heydər Əliyevin, Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi zamanı şəhid olan hərbi qulluqçuların ruhu bir dəqiqəlik sükutla yad olunması və Dövlət Himnimiz səsləndirilməsi ilə öz işinə başlayıb.
Konfransda çıxış edən Neftçala Rayon İcra Hakimiyyəti Başçısının müavini-Sosial-iqtisadi inkişafın təhlili və proqnozlaşdırılması şöbəsinin müdiri Burcalı Ağayev Rayon İcra Hakimiyyətinin Başçısı Mirhəsən Seyidovun konfrans iştirakçılarına təbrikini diqqətə çatdırıb və Azərbaycanda Dövlət Qadın siyasətinin həyata keçirilməsi istiqamətində görülən işlər haqqında geniş məlumat verib.
Konfransda Rayon İcra Hakimiyyətinin Başçısı aparatının Yetkinlik Yaşına Çatmayanların İşləri və Hüquqlarının Müdafiəsi üzrə Komissiyanın uşaqlarla iş üzrə məsləhətçi-psixoloqu Esmira Məmmədzadə rayon qadınlarının V konfransından VI konfransınadək ötən müddət ərzində rayon ərazisində ailə qadın siyasəti sahəsində aparılan işlər, əldə olunan uğurlar və qarşıda duran məsələlər haqqında konfrans iştirakçıları qarşısında geniş məruzə ilə çıxış edib.
Konfransda çıxış edən şəhid anası Arzu Əliyeva, Azərbaycan Respublikası Yazıçılar Birliyinin üzvü Rühəngiz Nəcəfova, Neftçala rayon Mərkəzi Xəstəxanası Publik Hüquqi Şəxsinin həkimi, Neftçala rayon Səhiyyə işçilərinin Həmkarlar İttifaqı Şurasının sədri Nəcibə Abdullayeva,Şirvan-Salyan Gənclərin İnkişaf və Karyera Mərkəzinin Neftçala bölməsinin mütəxəssisi Əfsanə Abdullazadə, Rayon “Gündoğar” qəzetinin baş redaktoru Bədirə Niftəliyeva çıxış edərək qadının ailədə və cəmiyyətdə xüsusi hörmətə malik olmasından, gənc nəslin tərbiyəsində müstəsna xidmətlər göstərməsindən danışıb, qadınların bundan sonrada həyatımızın müxtəlif sahələrində öndə getmələrini arzulayıblar.
Çıxışlardan sonra konfransda iştirak edən rayon qadınlarını maraqlandıran suallar cavablandırılıb və Azərbaycan Qadınlarının VI Qurultayında səsləndirilməsi üçün onların təklif, istəkləri dinlənilərək qeydə alınıb.
Konfransın sonunda konfrans iştirakçıları ilə xatirə şəkili çəkilib.
