“Nə? Harada? Nə zaman?” intellektual oyunu formatında bilik müsabiqəsi keçirilib

“Zəfər günü” münasibətilə Neftçala rayonunda silsilə tədbirlər davam edir. Qeyd olunan tədbirlər çərçivəsində 04 noyabr 2024-cü il tarixində Neftçala Rayon İcra Hakimiyyətinin dəstəyi,  Şirvan-Salyan Regional Gənclər və İdman İdarəsinin Neftçala rayonu üzrə gənclər və idman sektoru və Neftçala Peşə Məktəbi publik hüquqi şəxsin birgə təşkilatçılığı ilə Neftçala Peşə Məktəbinin tələbələri arasında “8 Noyabr-Zəfər Günü”nə həsr olunan “Nə? Harada? Nə zaman?” intellektual oyunu formatında bilik müsabiqəsi keçirilib.
Tədbirdə Neftçala Rayon İcra Hakimiyyəti başçısı aparatının aparıcı məsləhətçisi Esmira Məmmədzadə, Şirvan-Salyan Regional Gənclər və İdman İdarəsinin Neftçala rayonu üzrə gənclər və idman sektorunun, Neftçala Peşə Məktəbi publik hüquqi şəxsin rəhbərləri, təşkilatçı qurumların əməkdaşları, gənclər iştirak edib.
İlk öncə xalqımızın ümummilli lideri,Ulu Öndər Heydər Əliyevin və Azərbaycan Respublikasının ərazi bütövlüyünün, müstəqilliyinin, konstitusiya qurluşunun müdafiəsi zamanı şəhid olan hərbi qulluqçuların əziz xatirəsi bir dəqiqəlik sükutla yad edilib.
Çıxışçılar- Neftçala Rayon İcra Hakimiyyəti başçısı aparatının aparıcı məsləhətçisi Esmira Məmmədzadə, Neftçala rayon gənclər və idman sektorunun müdiri Araz Əhmədov, Neftçala Peşə Məktəbinin direktoru Tarıyel Yaqubov “Zəfər günü” münasibətilə iştirakçıları təbrik edib, yarışın məqsədi və əhəmiyyəti haqqında ətraflı məlumat verərək iştirakçılara uğurlar arzulayıblar.
Gərgin mübarizə şəraitində keçən yarışda hər birində altı üzv ümumilikdə 42 nəfər tələbə olmaqla 7 komanda iştirak edib. Yekunda, I yerdə “Qafqaz qartalı” komandası, II yerdə “Zəfər” komandası, III yerdə isə “Cəsurlar” komandası qərarlaşıb.
Tədbirin sonunda qalib komandalar kubok və hədiyyələrlə mükafatlandırılıb.
Qalib komandaları təbrik edir, onlara gələcək fəaliyyətlərində uğurlar arzu edirik.