"Azərbaycan Respublikasının Konstitusiyası və suverenliyinin bərpası Ulu Öndər Heydər Əliyev ideyalarının və müdrikliyinin təntənəsidir"mövzusunda dəyirmi masa keçirilib

19 mart 2025-ci il tarixdə "Konstitusiya və Suverenlik ili" çərçivəsində Neftçala Rayon İcra Hakimiyyətinin təşkilatçılığı ilə Neftçala Rayon İcra Hakimiyyətində "Azərbaycan Respublikasının Konstitusiyası və suverenliyinin bərpası Ulu Öndər Heydər Əliyev ideyalarının və müdrikliyinin təntənəsidir" mövzusunda dəyirmi masa keçirilib.

Tədbirdə Rayon İcra Hakimiyyəti başçısının birinci müavini Şaiq Məmmədov, Rayon İcra Hakimiyyətinin, rayonun hüquq-mühafizə orqanlarının məsul əməkdaşları, inzibati ərazi dairəsi üzrə nümayəndələr iştirak edib.

İlk öncə Ümummilli lider Heydər Əliyevin və torpaqlarımızın azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə Rayon İcra Hakimiyyəti başçısının birinci müavini Şaiq Məmmədov açaraq Azərbaycan Respublikası Prezidentinin 2025-ci il 11 fevral tarixli 477 nömrəli Sərəncamı ilə təsdiq edilmiş “Azərbaycan Respublikasında 2025-ci ilin “Konstitusiya və Suverenlik ili" elan edilməsi ilə bağlı Tədbirlər Planı”nda nəzərdə tutulan tədbirlərin icrasını təmin etmək məqsədilə "Konstitusiya və Suverenlik ili" çərçivəsində Konstitusiyanın qəbul edilməsinin 30-cu və Vətən müharibəsində qələbənin 5-ci ildönümü, ölkəmizin ərazi bütövlüyünün və suverenliyinin tam bərpası münasibətilə, hüquqi dövlətçilik və suverenlik dəyərlərinin möhkəmləndirilməsi, cəmiyyətdə hüquq mədəniyyətinin inkişafı, insan hüquq və azadlıqlarının qorunması, geniş təbliği məqsədilə rayon ərazisində həyata keçirilən zəruri tədbirlər və maarifləndirmə işləri barədə geniş məlumat vermiş və sözü tədbirin aparıcısı Cəngan kənd tam orta ümumtəhsil məktəbinin tarix müəllimi Şəhrəbanu Əhmədovaya təqdim edib.

Şəhrəbanu Əhmədova "Azərbaycan Respublikasının Konstitusiyası və suverenliyinin bərpası Ulu Öndər Heydər Əliyev ideyalarının və müdrikliyinin təntənəsidir" mövzusunda geniş məruzə ilə çıxış edib.

Daha sonra Neftçala Rayon Prokurorunun böyük köməkçisi İsmayıl Məmmədli, Neftçala Rayon Polis şöbəsi rəisinin şəxsi heyətlə iş üzrə köməkçisi Valeh Hətəmov, Neftçala Rayon Məhkəməsinin hakim köməkçisi Ziya Yusifzadə, Neftçala Rayon Yanğından Mühafizə Hissəsinin 110 nömrəli Yanğından Mühafizə Bölməsinin rəisi Gülhüseyn Nəcəfov, “Gündoğar” qəzetinin redaktoru Bədirə Niftalıyeva çıxış edərək, Müstəqil Azərbaycan Respublikasının ilk Konstitusiyasının tarixi zərurətdən yarandığını və banisinin Ulu Öndər Heydər Əliyev olduğunu diqqətə çatdırıblar. Eyni zamanda bildiriblər ki, Ulu Öndər müstəqil Azərbaycan dövlətinin qurucusu olduğu kimi, onun milli ideologiyası – azərbaycançılığın da, azərbaycançılıq ideologiyasına söykənərək yaradılan ilk Konstitusiyanın da banisi hesab olunur. 1995-ci il noyabrın 12-də Konstitusiyanın qəbulu müstəqillik tariximizin ən mühüm hadisələrindən biri olmaqla yanaşı, Ümummilli Lider Heydər Əliyevin Azərbaycan dövlətçiliyi qarşısında ən böyük xidmətlərindən biridir. Çıxışçılar eyni zamanda qeyd ediblər ki, ötən müddət ərzində ərazi bütövlüyünün, suverenliyinin bərpa edilməsi müasir Azərbaycan tarixinin ən mühüm hadisəsinə çevrildi. 2020-ci il sentyabrın 27-də Ermənistanın təxribatlarına cavab olaraq başlanmış Vətən müharibəsində əldə edilmiş Zəfər, eləcə də 2023-cü il sentyabrın 19-20-də həyata keçirilmiş uğurlu antiterror əməliyyatı sayəsində ərazi bütövlüyümüz və suverenliyimiz tam bərpa olundu. Bu isə həm də o demək idi ki, artıq Azərbaycan Konstitusiyasının hüquqi qüvvəsi işğaldan azad edilmiş bütün ərazilərdə bərqərar olub.

Daha sonra tədbir mövzu ətrafında müzakirələrlə davam edib.